Garðbæingar hafa lengi búið við lægsta útsvarið meðal stærstu sveitarfélaga landsins. Þá stöðu viljum við verja ásamt því að leitaleiða til lækkunar á öðrum álögum á einstaka hópa.
Ábyrgur rekstur og sterk fjárhagsstaða er grunnurinn að góðri þjónustu og tryggir að hægt sé að framkvæma meira í þágu íbúa en víðast annars staðar er raunin.
Við viljum að Garðbæingar njóti fyrsta flokks heilbrigðisþjónustu sem mætir nútímaþörfum vaxandi bæjarfélags. Við leggjum áherslu á valfrelsi og samstarf við sjálfstæða sérhæfða rekstraraðila.
Við viljum að lýðræðisleg vinnubrögð, stafræn þróun og samfélagsábyrgð einkenni alla stjórnhætti og stefnumótun Garðabæjar. Upplýsingamiðlun þarf að vera gagnvirk og gera þarf íbúum auðvelt að fá upplýsingar og koma fyrirspurnum til réttra aðila innan stjórnsýslu bæjarins.
Garðabær á að vera í fremstu röð í umhverfismálum og snyrtimennsku. Mikil lífsgæði felast í umhverfi okkar og ósnortinni náttúru. Vinnum markvisst eftir loftslagsstefnu og „Garðabær gegn sóun“ í öllum rekstri bæjarins.
Fjölbreyttir valkostir í húsnæði fyrir unga sem aldna. Við leggjum áherslu á fjölbreytta húsa- og íbúðagerð sem uppfyllir þarfir fólks á ólíkum æviskeiðum. Skipulag í Garðabæ á, hér eftir sem hingað til, að ýta undir fjölskylduvænt umhverfi, góðan bæjarbrag og tengingu við náttúruna.
Við viljum að Garðabær sé vel tengdur með almenn-ingssamgöngum og stígum, innan hverfa og frá strönd til upplands. Það er viðvarandi verkefni að efla og auðvelda samgöngur innan bæjarins og utan til að tryggja að íbúar komist leiðar sinnar á greiðan og öruggan hátt.
Leik- og grunnskólar Garðabæjar eiga að bjóða upp á bestu mögulegu aðstöðu fyrir fjölbreyttar námsleiðir, útikennslu og nám í gegnum leik. Auk þess viljum við tryggja góða vinnuaðstöðu fyrir nemendur og kennara, félagsaðstöðu, rými fyrir tónlistarnám, bókasafn/upplýsingatæknirými, matsal og ýmis rými fyrir sértæka þjónustu. Skólalóðir og leiðir að skóla eiga að vera öruggar og bjóða upp á samveru
Við ætlum að skipuleggja og ljúka í áföngum framkvæmdumvið heildstæðan miðbæjarkjarna á Garðatorgi í samvinnu við bæjarbúa og hagsmunaaðila. Aðlaðandi miðbær eflir bæjarbrag, laðar að fólk, fyrirtæki og þjónustu. Áhersla verður lögð á nútímalega nálgun þar sem íbúum stendur til boða fjölbreytt verslun og þjónusta, vettvangur til samveru, afþreying og listir.
Þjónusta við fatlað fólk í Garðabæ hefur vaxið umtalsvert undanfarin ár. Við viljum vinna áfram að því að efla þessa þjónustu, bæta upplifun notenda og mæta áfram þörfum um sjálfstæða búsetu.
Við erum stolt af hinni breiðu flóru frjálsra félaga í bænum sem starfa í þágu bæjarbúa og viljum auka samstarfið við þau. Heilsueflandi starfsemi og lista- og frístundastarf er sterkara í samvinnu við félögin og við vitum hve mikilvægur stuðningur bæjarins við starfsemi þeirra er.
Eitt stærsta verkefnið í Garðabæ á næstu árum og áratugum verður að byggja upp gott og gefandi samfélag fyrir eldra fólk með áherslu á heilsutengdar forvarnir og lýðheilsu. Við ætlum að mæta þörfum eldra fólks og hlúa að og efla alla þjónustuþætti.
Við viljum að Garðabær sé annálaður menningarbær. Menningarstarf skapar mannlíf, þroskar okkur og gerir tilveruna litríkari. Við ætlum að styðja við fjölþætt menningar- og listastarf Garðbæinga og standa vörð um sögu okkar og menningarminjar. Allt auðgar það mannlífið í Garðabæ.
Tónlistarnám er hluti af námsframboði ungmenna og fullorðinna í Garðabæ. Mikilvægt er að námið sé aðgengilegt sem flestum og að horft sé til ólíkra námsleiða. Mikill tónlistaráhugi er meðal ungs fólks í Garðabæ og við eigum margt öflugt tónlistarfólk sem er auðlind fyrir menningarlíf bæjarins.
Garðabær býr að framúrskarandi aðstöðu til íþróttaiðkunar og útivistar. Við ætlum að halda áfram að byggja upp frábæra aðstöðu fjölbreyttrar flóru íþrótta og útivistar. Við viljum huga sérstaklega að viðhaldi og endurbótum mannvirkja.
Í Garðabæ viljum við vera stöðugt á verði og horfa til nýrra þátta í forvarnastarfi. Samfélagsþróun, breytt viðhorf og ný þekking kalla sífellt á nýjar nálganir og samhæfingu ólíkra aðila á sviði forvarna.
Við viljum að Garðabær sé eftirsóknarverður staður til að byggja upp fyrirtæki og reka fjölbreytta atvinnustarfsemi og að bæjarbúar njóti kosta þess að geta sótt atvinnu í nærumhverfinu.
Garðabær er skólasamfélag í fremstu röð sem vill búa vel að nemendum, aðstandendum þeirra og starfsfólki. Við viljum efla faglegt starf í skólunum í anda nýrrar Menntastefnu Garðabæjar. Farsæld og framsækni eru leiðarljós starfsins.
Leikskólar í Garðabæ eiga að vera eftirsóttir vinnustaðir sem einkennast af fagmennsku þar sem starfsfólki og börnum líður vel. Foreldrar upplifi fagmennsku, öryggi og góða þjónustu. Við ætlum að leggja sérstaka áherslu á að efla og þróa enn frekar leikskólastarfið í Garðabæ.
Við viljum að Garðbæingar séu öruggir heima við og í bænum okkar. Við munum áfram leitast við að skapa öruggara umhverfi fyrir bæjarbúa.
Í Vetrarmýri er að myndast sterk miðstöð fyrir samveru fjölskyldunnar, margs konar heilsueflingu og íþróttastarfsemi. Við viljum halda áfram að þróa svæðið á grunni skipulagsins sem samþykkt var á síðasta kjörtímabili.